Í þessum þætti ferðast Ása um einn af hennar uppáhalds stöðum á Íslandi, Skaftafell. Hún skellir sér í ferðalag um sjálfan Vatnajökulsþjóðgarð þar sem hún miðlar skemmtilegum staðreyndum um svæðið. Við tekur bátsferð um Fjallsárlón þar sem hún fær að njóta ósnortinnar náttúru og gefst kostur á að taka einstakar myndir.

Í þessum þætti fer Ása í skemmtilega traktorsferð til þess að komast í Ingólfshöfða en þar bíður hennar ganga upp á höfðann, fuglaskoðun og frábært útsýni. Ása lýsir ferðinni sem einstakri skemmtun fyrir alla fjölskylduna. Því næst tekur við slökun í heitri náttúrulaug í Hoffelli þar sem fimm heitir pottar eru á svæðinu.

Í þessum þætti er ferðinni heitið á Falljökul sem er hluti af Vatnajökli. Ása skellir sér í létta og stutta jöklagöngu þar sem hún gengur á jöklabroddum í stórbrotnum jökuldal ásamt því að segja frá skemmtilegum staðreyndum um jökulinn.

Ása endar ferðalagið sitt um ríki Vatnajökuls á heimsókn á Höfn í Hornafirði. Hún fer yfir allt það sem Höfn hefur upp á að bjóða og bendir á þær náttúruperlur sem staðsettar eru í nágrenni bæjarins. Hún fer um borð í bát sem heitir Sigurður Ólafsson SF44 þar sem hún ræðir við sjálfan skipstjórann. Dagurinn endar svo á dýrindis humarveislu, enda bærinn oft kallaður humarhöfuðstaður Íslands.