Gamlabúð
Í Gestastofu Vatnajökulsþjóðgarðs í Gömlubúð á Höfn er sagt frá samspili manns og náttúru, jöklum og jarðfræði, en einnig er hægt að fræðast um verslunarsögu Hafnar. Sérstök áhersla er lögð á fuglalíf enda er Hornafjörður einn helsti viðkomustaður farfugla á Íslandi.
Í Gömlubúð er lítil verslun með áherslu á bækur, minjagripi og vörur úr héraði. Í húsinu er gott aðgengi fyrir hreyfihamlaða.
Afgreiðslutími getur verið breytilegur eftir árstíma. Nánari upplýsingar er hægt að finna á heimsíðu þjóðgarðsins hér
Gamlabúð
Heppuvegi 1
780 Höfn
Sími 470-8330
[email protected]
Listasafn Hornafjarðar
Svavarssafn
Listasafn Svavars Guðnasonar á Hornafirði opnaði við hátíðlega athöfn föstudaginn 24. júní 2011. Safnið er staðsett í Ráðhúsi Hornafjarðar og opnunarsýningin var á verkum Svavars Guðnasonar, en sveitarfélagið hafði þá nýverið fengið verk Svavars að gjöf frá ekkju hans, Ástu Eiríksdóttur.
Kjarni safneignar Listasafnsins samanstendur af verkum Svavars Guðnasonar og fleiri hornfirskra málara og á safnið nú yfir 500 verk
Listasafnið stendur fyrir minnst þremur fjölbreyttum sýningum árlega. Á sumrin leggur safnið áherslu á verk Svavars Guðnason. Á haustin eru fræðslutengdar sýningar og á vorin list frá Hornafirði eða tengd svæðinu.
Allt árið um kring er þó hægt að sjá verk og fræðast um Svavar í Ástustofu. Þar sem eru myndbönd, fjölbreitt fræðandi lesefni og listaverk. Svavarssafn er staðsett í Ráðhúsinu á Höfn. Safnið tilheyrir Menningarmiðstöð Hornafjarðar.
Safnið er í Ráðhúsi Hornafjarðar Hafnarbraut 27 á Höfn. Sími: 470 8050.
Vetraropnun: október – 31. maí. Virka daga 9:00-12 & 13-15:00.
Sumaropnun: 1.júní – 1. ágúst. Virka daga 9:00-12:00 & 13:00-15:00. Helgar 13:00-17:00.
Sýningin Uppsprettur – Innlit á vinnustofu stendur í sumar á henni má sjá verk Höskuldar Björnssonar myndlistamanns.
Menningarmiðstöðin
Verbúðin í Miklagarði er opin í sumar, en þar er hægt að skoða hvernig aðstæður sjómanna í verðbúðum voru á árum áður þar sem ein verbúðanna hefur verið færð í upprunalegt horf.
Í Stúkusalnum í Miklagarði verður opnuð á Sjómannadaginn 7. júní ljósmyndasýning úr ljósmyndasafni Héraðsskjalasafns Austur-Skaftafellssýslu þar sem bátum og lífinu um borð verða gerð skil.
Þórbergssetur í Suðursveit
Á Hala er Þórbergssetur sem að er menningarsetur helgað minningu Þórbergs Þórðarsonar rithöfundar. (1888 – 1974). Hann var fæddur á Hala í Suðursveit. Þar er veglegt safn og minjagripasala auk veitingarrekstur. Hægt er að fara um safnið með hljóðleiðsögn og njóta texta og frásagnarsnilldar Þórbergs, en einnig hægt að panta leiðsögn heimamanna um safnið fyrir hópa. Þórbergssetur er opið allan daginn frá 10:00 – 18:00 en veitingahúsið er opið til klukkan 20:00 á kvöldin.
